فطيرة الزعتر الشامية ممكن تتقدّم مع سلطة الخضار وسلطة الزبادي أعدّتها لكم: آية خالد النهارده بنقدم لك طريقة عمل فطيرة الزعتر الشامية، وهي فطائر شهية جدا ومناسبة لو زهقتي من الأكل العادي ومحتاجة للتغيير إنتي وأسرتك.. فطيرة الزعتر المقادير: 1 كوب دقيق ملعقة صغيرة خميرة فورية 3 ملعقة كبيرة زيت زيتون ملعقة صغيرة بيكنج بودر 1⁄2 ملعقة صغيرة سكر 1⁄2 كوب زعتر 1⁄2 كوب سمسم كوب لبن دافئ 1 بيضة ملح الطريقة: 1- اخلطي الدقيق في طبق غويط مع البيض والخميرة والبيكنج بودر والملح والسكر وملعقة زيت زيتون، واعجنيهم باللبن، لحد المزيج ما يختلط كويس، وتبقى عجينة طرية في إيدك ومش بتلزق في نفس الوقت، وسيبيها تختمر نص ساعة. 2- اضربي السمسم مع الزعتر في الكبة، وبعد كده ضيفي عليهم زيت الزيتون واعجنيهم بيه، لحد ما يبقى مزيج طري وناعم. 3- قطعي العجينة كور، واعمليها فطاير حجمها متوسط، وافردي عليها الزعتر، وحطيها في صينية، ودخليها الفرن على درجة حرارة 170 لمدة نصف ساعة ولحد ما وشها يحمرّ، وقدميها مع سلطة زبادي.. وبالهنا والشفا. وبكده تكون خلصت وصفتنا النهارده.. استنونا بكره مع وصفة جديدة.. سلام..