- ألو طوارئ الكهرباء - حاضر يا عم ، مقطوع من مأرب ، الخلية نائمة ، الكايبل ضرب ، مافيش ديزل ، سجل اسمك والسيارة ع تجي إلى عندك ؟ ********** - ألو صاحب ألوايت حاضر يا عم معي خمس زفات أوديهن وانتم بعدهم ، أصلا ما في ديزل وماء المشروع بطل يجيء ، أنا واقف الآن بالطابور والوايت بأربعة آلاف ريال ما فيش ديزل !! ********** ألو الانترنت نعم يا أخي لنا منتظرين الكهرباء يومين ما صدقنا جاءت والانترنت قطع أنتم مسويين جمعية فينا حاضر يا عم طفي الجهاز والميديوم خمس دقائق وأنا باسوي لك تحديث ؟ ********** ألو قسم الشرطة ؟ - أيوه فيه عصابة مسلحة هجمت على الدكان المجاور لنا - السيارات كلهن خارج كيف ؟ أقولك ما فيش سيارة فاضية نجي لكم ؟ إذا أنت مستعجل استأجر سيارة وتعال شلنا أيش رأيكم أقول للعصابة المسلحة تستأجر سيارة انجيز وتجي تحبس نفسها بنفسها . ********** ألو المطافيء الحقونا البيت يحترق والحريق كبير وممكن يمتد لبيوت أخرى السيارات موجودة لكن مافيش فيها ماء خلاص عبوها بترول وتعالوا ولعوا البيوت الباقية. ************ ألو الاتصالات أيوه معك اين سارت التغطية ؟ ما في ديزل ولا كهرباء حتى التغطية كمان طلعت على ديزل وكهرباء طيب ليش الكرت أصبح يخلص بأسرع سرعته لا يكون هو كمان شغال على ديزل !! ************** - ألو التاكسي ؟ - ايوه معك - اشتي مشوار الى المنطقة الفلانية - بألف وخمسمائة ريال - انا اروح معك دائما بسبعمائة - ماحصلنا بترول بالكاد معي شوية امشي فيهم *************** ألو المقوت ؟ أيوه معك معك قات حالي ينسيني الواقع المر الذي أعيشه في هذا البلد معي قات يخليك تستضي ماليزيا من اللي بتخزن منه الحكومة بس غالي مرة وسعره مضاعف يا ساتر ليش والدنيا حمى وبورة بورة أيش ؟ ما فيش ديزل والرعية يطوبروا عند المحطات. المفروض الحكومة تخزن للشعب بلاش. ليش ؟ - لولا تخديرة القات ما صبر الشعب ساعة واحدة وهو يعاني من انعدام أبسط الخدمات. اذكروا الله وعطروا قلوبكم بالصلاة على النبي اللهم ارحم أبي واسكنه فسيح جناتك وجميع أموات المسلمين.
