بغيتو الصدق ولا ود عمه نحن الحضارم بغينا لبونا لفخ لما نقول امنا بالله والله فرحنا بالوفود الحضرميه اللي وصلت لما عندنا في الرياض وقلنا ما شاء الله جونا الهوامير والناس الكبار اللي من صدق بيرفعون الراس وبيشرفون حضرموت وبيخرجون حقوقها وبيفكون على خلق الله في البلاد بدل المحافظ الهربان باحميد اللي عامد الرياض وغرق وسط صحن كبسه وما شاء الله جونا شي حلف وشي مجلس اهلي وشي عصبه وشي مشايخ وشي مقادمه وشي حوار وخليق امه وقلنا حيابهم حيابهم جاش الخير يا حضرموت الخير وعلى قول المثل يا فرحه ما تمت لقينا اليماعه ميمي كما ويوه ومن يوم وصلوا وهم من دار باقفه لا دار باشادي من عزومه لا عزومه ومن سمره لا سمره ومن حفله لا حفله ولا قلت وين المقدم قالوا معزوم وين الشيخ قالوا في حفله وبغيتوا الصدق انا خبخبت قفاهم وما شاء الله تبارك الله عزومات تصقع كل ليله ان ما هو غداء هو عشاء شي حق حموم وشي حق عوابثه وشي حق يافع وشي حق مندري من وضاعت حضرموت وحقها وشغلها بين الصحان والتباسي واقسم بالله ان حضرموت أولى بميات الألوف اللي راحت في العزومات وبغيتوا الصدق استغربت حاجه في كل العزومات هذي شخص واحد ماهو فيه يعني ما حدهو على قولنا ما حضر ولا عزومه ولا شفته في حفله ولا مجلس حتى الحوار اللي ابو مية الف ريال من ابو عقال ما حدهو ما حضره تعرفون من هوذا الشخص هذا الشخص هو الرجال اللي كلنا سبينا فيه وشتمناه وسخرنابه الرجال اللي ما حد وقف معه لا حكومة ولا رئيس ولا شعب ولا ناس وانا اول واحد كتبت عليه وبقسوه وجلافه وسخريه واتهمناه انه هارب وجبان وتعبان وحق كبسات وعرضات وكان نفسي اشوفه في شي مجلس او عزومه وبا رويه شغله لكن ما لفيته وللاسف طلع هو اللي يشتغل لحضرموت واهلها ليل نهار بعيد عن الفوضى والربشه والكلام الفاضي وقسما بالله أني استحيت على وجهي يوم قابلته في المكتب اللي عمله في الرياض يتابعون فيه شغل حضرموت ومواضيعها وحقوقها مكتب حق محافظ حضرموت شقة مسكينه عاديه نصها سكن ونصها استقبال ومكتب ويوم جابو الغداء قلت أكيد شي كبسه ولا مندي ومظبي طلع رز ودجاج وخبز ومن يوم دخلت وانا اسمع واشوف المتابعات والاتصالات شي في بترول وديزل شي في مرضى وجرحى وشي في عيالنا المعلقين برع البلاد وشي في عسكر وشي في شغلات حق اغاثه قعدت اسمع ذا كله وانا اتفرج في وجه المحافظ واتفرج عليه وهو يكلم في تلفونه اللي ما يوقف ما سمعت شي غير متابعات وشغل شي مع الحكومة وشي تجار وشي السعوديين واعتذارات من عزايم وولايم والله الرجال صوته مشحب ويتكلم بحرقه وقوه جلست ساكت اشوف الداخل والخارج وقاعد اتفكر في ذا الرجال اللي قلت عليه وما خليت ولا بقيت وبعد ما خلص لفت لا عندي وقال العفو منك هت لي عندك قلت له أنا اللي العفو منك يا سيد الرجال أنا باقول العفو منك يوم ضيعناك في وقت كنت محتاج نحن فيه وبدل ما نوقف معك وقفنا ضدك وربي لا يسامحهم اللي غالطونا وعبوا كيراننا عليك وفاجاني بابتسامة وقال يا بوسمير الناس معذورة من كثر ما تعانيه ومن طلع في القدي لازم يتحمل كلام الناس من صدق هتفه على ابونا نحن الحضارم ان جانا عيف لفخنا وان جانا الزين لفخناه..
