يواصل الكاتب اليمني الساخر عبدالكريم الرازحي ابداعاته الشعرية حول الراعية التي ينشرها في صحيفة اليمن اليوم. وهاجم الرازحي في قصيدته الجديدة بعنوان"ياراعية قاهُمْ عليكْ عصابة" لصوص الثورة اليمنية والمزايدات التي يتحدوث عنها بشأن رفع الحصانة عن النظام السابق ومحاكمتهم. وفيما يلي نص القصيدة: ياراعية قاهُمْ عليكْ عصابة والشعر ما ينفع ولا الكتابة، لو تعزفي عُمْرِكْ على الربابة لا شْتِحْتَركْ نملة ولا ذبابة. *** ياراعية عُمْرِكْ زَلَجْ غلايبْ نشوان ماتْ وغابت الجَوَالِبْ، لا عاد نُجوم تُبْدِيْ ولا سحايِبْ دهرِكْ عطش وعيشتِكْ مصايبْ، ليلِكْ ظلامْ وليلتِكْ عقاربْ مسكين! كم سكين في الجَشَايبْ! يانَا عليكْ قلبي عليكْ ذايبْ. *** يا راعية مافيش معكْ شهادة معِكْ غنم لكن بلا قيادة دوله معك لكن بلا سيادة فرْشِكْ معِكْ لكن بلا قعادة زادوا اللصوص تناتفوا الوسادة. *** يا راعية قا كمَّلوا الخِزانة هاذُمْ ذئابْ ما فيش لهم أمانة، ثوارْ لصوصْ وعندهم حصانة لو تنقدي فلتان أو فلتانة مع الفُلُولْ أنتِ وهُمْ بِخَانة شْتِتْحَاكمي بتهمة الخيانة.