* * * * أنا مصرية متزوجة من 3 سنوات وعندى بنت وحاليا مقيمين بالسعودية ..ومن فترة سمعت زوجى وهو بيكلم أهلة على النت بيقول هو ده النسب اللى يشرف . .هو ده النسب اللى يشرف هما دول اللى الواحد يشيلهم على دماغة .وكان صوتة عالى وهو بيتكلم ؛فى نفس اليوم دة كانت اختة ولدت وكنت خارجة من الغرفة علشان اقولة انى عاوزة ابارك لها لو كانت موجودة... بس قبل ماهو يشوفنى سمعت منه الكلام ده ؛رجعت تانى وما كلمتة لانى اتصدمت من اللى قالة.. ولقيتة من نفسه كدة واخد جنب منى ومش بيكلمنى ؛الله اعلم يمكن علشان ما باركتش لاختة وفضل كام يوم على كدة وبعدين لقيتة جاى يتقرب منى ساعتها بقى واجهتة بالكلام اللى قالة ... وكان مستغرب أوى أنى سمعته وهو بيتكلم أو بيقول كدة؛ قولتلة لانى كنت عاوزة أبارك لاختك ولما سمعتك رجعت تانى .. وسالتة اية معنى كلامك هو دة النسب اللى يشرف ... معنى كدة ان النسب بتاعك مش عاجبك قالى انا ما جبتش سيرتك انا بقول عليهم هما ؛ايوة مش عاجبنى قولتلة دول اهلى اللى نسبهم مش مشرفك ؛انت اتجوزتنى لية لما نسبك مش عاجبك .قالى لو عاوزة تنزلى مصر من الصبح تنزلى عاوزة اية .قولتة عاوزة اعرف يعنى اية الكلام دة والنسب اللى مشرفكم دة عمل اية احنا ما عملناهوش .مردش عليا ؛وانا قولتلة على كل حاجة عملناها انا واهلى وهو طبعا علشان كان مسافر ومش شايف حاجة كانو اهلة بيقولو على كل حاجة بس بطريقة مش كويسة علشان يخلو الصورة عنده وحشة منى انا واهلى . وخلوه يمنعنى انى اروح بيت اهلى وهو مسافر ؛كنت بروح يوم واحد فى الاسبوع ؛وكان دايما فية مشاكل لانهم عاوزنى اشتغلهم خدامة وهو كان بيسمع منهم كل شوية مراتك قالت وعادت ودخلت وخرجت ونزلت والكلام دة كلة وكان اخوه يشتمنى ويطول لسانة عليا واقولة ؛كان يطلعنى انا اللى غلطانة وعمره ماجاب لى حقى منهم كان دايما يجى عليا علشان يرضيهم حتى بعد ماسافرت المشاكل ورايا ورايا وكل دة وانا بعدى اى حاجة واسامحة بس حكاية النسب دى بقى انا مش عارفة اخد قرار فية ارجوكم حد يساعدنى اطلب الطلاق ولا اية ومصير بنتى هيبقى اية؟ صديقتنا العزيزة الحياة الزوجية مليئة بالمشاكل والصعاب وليس من الممكن عندما نمر بأزمة معينة أن يكون حلها بالطلاق، ولا يمكن أن يكون الطلاق حل لمشكلات العديد من الناس . فمشكلتك لا تستدعي أبدًا أن تفكري في الطلاق وعاهدي نفسك أن تكوني دائمًا على القدر الكافي لتحمل أعباء الحياة ولا تجعلي أحد يفسد عليك حياتك، وتكونين أنت أول الخاسرين. أما عن المشكلة فأعتقد أن هذا الأمر يرجع للشحن الدائم لزوجك من ناحية أهلة وأنه ليس على العلم الكافي بأهلك فهو أكتفى بالسماع فقط دون أن يرى شيء أو يمسك شيء بيده يستند عليه، ،وهنا أنصحك نصيحة من القلب لا تقفي على كل ما تسمعيه، فلو وقفتي على كل شيء ستجني الكثير من المشاكل، بمعنى لا يهمك كلام أحد فدعي الأيام تثبت له عكس ما يقال وسيرد الله عنك هذه الغيبة ولو بعد حين فوالله رأيت بعيني أمثلة عملية على مشكلتك وكان وبعد مرور الوقت أصبحت هذه المرأة هي المقربة من أهل زوجها ويتمنون الرضا لها . وليكن شغلك الشاغل هو طفلتك وزوجك، اغمري زوجك بالحب والمودة والإحترام ، ستجدي منه كل خير، وارتفعي عن أحقاد البشر، فأحيانًا يجب علينا أن ندوس على تلك الأحقاد كي نعلو بأنفسنا عنها. مواضيع متعلقة بص وطل
