جمعني من قرابة أسبوع .. لقاء عابر بصديق لي من أصدقاء الزمان الجميل الأوفياء.. يشتغل في ((مصافي عدن)) بالبريقة - كان حينها أزمة بترول حادة في السوق – وقلت في نفسي قدها فرصة.. تسأله من باب ((فضول الصحفي)) عن أزمة البترول.. لعل عنده الخبر اليقين .. قلت لصاحبي: ((شوه هذا اللعب عندكم في المصافي وين البترول .. دايم ونحنا في أزمة بترول .. يا ناس أرحمونا .. بس كفاية .. المحطات ماشي فيها بترول .. نباك تقل لنا شوه هوه السبب..؟)) قال : (( يا بن دهيس .. أنته تبا تعرف شوه هوه السبب .. هب أتخبر الإدارة حقت شركة المصافي..؟ )) قلت له : (( اتصلت بالأرقام كلها حقت الشركة.. .. بس محد يرد..)) قال: ((خلاص .. نحنا اليوم في تاريخ 17/7/2017م.. والاحتياطي اللي معانا كله نفذ..)) قلت له: ((نفذ.. معناته ماشي عاد معاكم بترول ولا قطرة .. طيب وبعدين.. شوه الحل الناس يشكوا ويبكوا .. وصحاب المحطات الخاصة مطبرين لهم أيام والبوز حقتهم تهب فارغة وترجع فارغة ومسلّمين بيس.. طيب وبعدين كيف الخبر..؟ )) قال : ((وبعدين كان من المقرر أن تفتح مظاريف المناقصة اللي أعلنت عنها الشركة بتاريخ 12/7/2017م .. والآن نحنا في تاريخ 17/7- يوم لقائي به - وقد مرت على الموعد المحدد خمس ايام.. ولا نعرف حتى نحنا الموظفين بالشركة.. شوه هوه السبب .. خلي التبق مستور يا بن دهيس)) طيب وبعدين..؟ (( وبعدين .. يا حبيبي و فؤداي .. كانت معانا باخرة راسية في الميناء حق الشركة.. وقد ركّبنا البيبات إلى الخزانات منشان تفريغها .. لكن قالوا .. أن الباخرة نعم ماشي معاها أمر بالتفريغ من الجهة اللي تتبعها ..)) طيب وبعدين..؟ (( وبعدين وبعدين)) قلت له: ((ذلحين بتكلمنا كما الناس يا صاحبي ولا فجعان .. جالس تخابرني كما العجيز.. قالوا .. قلتي؟ قال: ((طيب .. حبه.. حبه.. شوف الخبر الثاني يا بن دهيس .. قصة الديزل .. كانت هنوك باخرة فيها ديزل .. وقد تم فحصه.. وكانت تنتظر الدخول للميناء للتفريغ .. فؤجئنا ببعض الأهالي يقولوا.. أن الباخره هربت)) أيوه.. والله طلبنا والله. هربت.. شوه هذا الخبر ..؟ شوه هذي المعواله ..؟ نحنا معانا لعب عويله .. والا معانا شغل دولة وبلاد ومصير بشر.. طيب لا وين هربت ..؟ قال صاحبي ..(( والله علمي علمك.. قالوا هربت .. قلنا هربت)) طيب ذلحين معاكم قليل بترول منشان (الماطور) حقي.. انا عندي القلب والسكر والشاهي والضغط خاف روح فيها.. قال(( ماشي معانا لا بترول ولا ديزل والا كنت بتجمّل معاك..)) طيب شوه عاد معاكم بتبيعوا تراب.. ولشوه عادكم مصلحين مصافي .. وشوه خبر الباخرة اللي حرقت من قفا – حسب ما يقولوا – والباخرة اللي هبت حضرموت .. وكم من هذي الخبابير..؟ قال: ((شوف لاتجرجرني في الهرجه كثير)) وسكت وقام من عندي.. قولوا ودعت صاحبي .. وهبيت ساني إلى اقرب ((محطة بترول خاصه)) .. وقلت لهم : معاكم بترول..؟ قالوا: ((لا .. معانا تراب ..)) كيف تراب.. مش هذي محطة بترول ؟ نقل لك : ((ماشي معانا بترول ياعاقل .. روح لك بعد حالك قدنا بغارى من نفوسنا..)) قلت : لا حول ولا قوة الا بالله.. قولوا يا جماعة الخير.. هبيت ((محطة الخليج)) في جولة السفينه وهيه ((محطة خاصة)) قلت لصاحب المحطة : شي بنلاقي معاكم بترول..؟ قال: ((شوف العيال..)) هبيت عند العيال.. وقلت لهم : شي معاكم بترول ..؟ قالوا : ((لا.. معانا تراب)) ايوه..شوه خبر التراب اليوم .. كلما هبيت محطة خاصة قالوا معانا تراب ..؟ طيب يا عويله مادام المحطات الخاصة فيها تراب .. أنا ذلحين بسالكم : هل ((بول الحمير )) يمكن أن يتحول إلى ((طاقة)) ويكون بديل عن البترول.. ويخلي ((البوابير ))تمشي..؟ قالوا : ((يه .. البوابير ممكن تمشي على بول الحمير .. بس انته غير المكينة.. وانتهت المشكله.. بابور يمشي على بول الحمير .. أحسن من البترول .. يا سلام أخر صيحة في اليمن .. وانته ماشي خسران حاجة.. كلما فرغ الخزان حق بابورك .. هب شوف لك حمار تبول داخله .. بلا خسارة بيس ولا جرجره من محطة لا محطة بعدك يا بترول .. اللي يومين يجي وعشر أيام ماشي .. وعلى ها المسلك كل يوم في تعب التعب..)) والله يبان كلام العويله صدق.. بوابير تمشي على ((بول الحمير)) .. ماقد كنا على بترول وديزل (( العيسي)) يجيبه لنا سلف.. بطرنا عليه وصلحنا قاع وقرمباع.. ومن باب الأمانة اقول .. أن تجربة شركة النفط بعدن .. في استيراد وتوزيع البترول تجربة ناجحة وجيدة ويشيد بها وبعدالة مديرها ((بن حدور)) كل من التقيتهم من صحاب المحطات الخاصة .. وقالوا : أن المصافي هيه سبب المشكلة وليست شركة النفط اللي أصبحت جهة تسويقية بعدما سحبوا منها صلاحيات الاستيراد .. بحسب ما قال مدير الشركة عند لقائه بهم.. بالامانة والديانة وضع المصافي بحاجة إلى تدخل ومعالجة مباشرة من الرئيس هادي ومن رئيس الحكومة بن دغر .. وما يفهم رطني إلا ولد بطني..!
