عفوا قطعت كلامك.. انتوا قلتوا لنا بعد ما نتخلص من الاستعمار ودولة الجنوب العربي بانقطف امعنب من امطاقة وبعدين زدتوا وقلتوا نتخلص من الموظفين القديمين لانهم كانوا موظفين مع الاستعمار وغير مواكبين للثورة والحقتوها بالتخلص من شلة العقداء وضفتوا كمان قحطان واليمين الرجعي وهذه الحمد لله تمت بفضل الثورة وماشي حصلنا عنب والان اشوفك تتلحوس وقد معك عذر ثاني.. اقول لك وين امعنب ؟ وشرف الثورة بايجي العنب بس اصبروا شوية...لانه لازم نتخلص من الإقطاع والكمبرادور والرأسماليين من التجار وعملاء الرأسمالية...لانه مانقدر نوفر العنب في ظل وجود هذه القوى المعرقلة للثورة .. يعني ايه؟ مافهمت. لازم نصادر ممتلكات الاقطاع ونضرب الكبرادور ونأمم ممتلكات الرأسماليين والتجار... طيب الاقطاع والرأسماليين والتجار وعرفناها...ممكن تقول لي ايش هو الكمبرادور؟ مدري والله بس من خلال الاسم يبان انهم حاجة مش تمام ومعرقلين للثورة... طيب وبعد ما تتخلصوا من ابتهم بايقع عنب من امطاقة؟ الله المستعان ...طبعا والا ليش قامت الثورة. طيب متى ارجع لك من شان امعنب؟ اعطينا فرصة اربع خمس سنين من شان نتخلص من كل القوى المعرقلة لصيرورة الثورة ..حتى تترسخ الثورة وتتجذر وتثبت اقدامها. تمام ...بس ايش هي امصيرورة؟ يا اخي انت تسأل اسالة غريبة...ايش عرف امي ايش معناها...انا اسمعهم يقولوا كذا...ومادام يقولوا كذا وبعدها يذكروا الثورة معناته انها كلمة مليحة.. خلاص خلاص لاتزعل...انا بارجع لك بعد امصيرورة حق الثورة واشتي منكم عنب من امطاقة ولا بانتحانق.