الحال اللي عليه أبين اليوم .. والله يوجع ويقطّع القلب .. أهلها في حالة من البؤس والشقاء والتعب .. وضياع الأمن والأمان .. وإنتشار الفوضى والمسلحين .. والله ما لأبونا درى.. شوه من (فال نحس) .. على أبين وأهلها .. ولما تسأل واحد من ((عيال أبين)) .. وراكم على هذا الحال التعيس الحزين الشمات النحس .. عيب عليكم وين رايحين .. خلاص بس كفاية ..؟ يقل لك .. شوف ياخي .. أبين سببها أهلها .. هم نفوسهم يقدروا يرجعوّها إلى الحال .. الي كانت عليه أيام زمان .. وهم نفوسهم اللي يقدروا يخربوها ويدمروها .. اليدات المخططة من خارجها .. واليدات المنفذة من داخلها ومن أهلها .. ولا نكذب على نفوسنا .. منوه اللي يلعب بأمنها اليوم ..؟ ومنوه اللي كمل الناس فيها فجايع ..؟ ومنوه اللي يفجر..؟ ومنوه اللي يقتل ..؟ ومنوه اللي يخرج ملثم في الليل وفي الصبح ..؟ قدّام خلق الله ..؟ أسألوا ودوّروا .. وتخبّروا معانا .. منوه اللي فجر (مصنع الذخيرة) ..؟ ومنوه اللي يقوم بتنفيذ الأغتيالات والسيطرة على المعسكرات والمرافق الحكومية وسرقة البنوك .. وإسقاط زنجبار وخنفر وجعار ولودر وقطع (الترقات) ورفع (البنادير السود) ..؟ ومنوه اللي أفتعل ما يسمى (بالقاعدة) .. والمعارك الطاحنة التي دارت فيها .. وتسببت في تشريد و نزوح وتجويع أهلها وخراب بيوتهم..؟ هذي الأسئلة كلها مشروعة .. وتبا أجابات من المتنافسين اليوم للسيطرة على أبين ..! آح .. آح .. وين أنتي يا أبين .. حقت زمان ..؟ وين سلا أهلش وعيالش..؟ وين الرزحة والدحيف ..؟ وين السبول والجهيش والعمبا والموز والحبحب ..؟ وين لجنة الأنعاش الزراعي ومحلج القطن (العطب) بالكود ..؟ وين لجنة أبين الزراعية المشتركة بين السلطنة الفضلية واليافعية اللي تأسست سنة (سبعة وأربعين ميلادية) ومؤسسها الأنجليزي (براين هوتلي).. وين هيئة دلتا أبين ..؟ وين ساحل أبين والمطَلع وملتقى العشاق والحبايب والخلاَن..؟ وين (الوراَد) كرامة عمر سالمين الشحاري (والد زميلنا الصحفي محفوظ كرامة).. وين الروا ولودر ومودية وزاره وباجدار ويرامس وامقليته وشقره وجعار وزنجبار وأحور والرميلة .. ( أنا في الرميلة وخليَ في الفيوش) .. على قولت خونا الفنان الحبيب الثاير الصديق العزيز الوفي محمد محسن عطروش – اطال الله في عمره – وين السيل والدفر ..؟ وين عبر عثمان ووادي بنا وسد وباتيس وحسان ..؟ وين عبر السركال وقناة جبل الأحبوش وسد الهيجة..؟ وين الخبير الزراعي والاعلامي الكبير منصور عوض جميع .. والأعلامي الزراعي الجهبذ عبدالله ناصر ناجي ..؟ وين خبير الابحاث الزراعية العالم المرحوم المعلم .. ؟ وين (فاطمة بت عيسى) ..؟ وين (اساطين الزراعة) القادمون من منطقة (الوهط لحج) إلى أبين في الاربعينات والخمسينات من القرن الماضي .. السادة .. عيدروس بن زين الملقب (ديجول) اللي (برت) أراضي أبين الزراعية في عهد (السلطنة الفضلية) .. وجعفر عيدروس محمد .. ومحمد علوي محمد .. وعبدالله جعفر وأخوه حسن جعفر وأخوه عبدالرحمن جعفر وأخوه الباجوري .. ومحمد زين .. وعيدروس النينوه .. ومحمد علي دهيس .. وحامد المقدي .. والخبز .. والقشقشة والقايمة طويلة ..؟ وين الشاعر الكبير المتصَوف (الوحش أبوبهية) صاحب القصيدة المشهورة: ( أبين بلاد الحاس والحسحاس والظلم الشديد ×× شابها معلول وشجاعها مقتول ×× شرها لا الأذنين وخيرها لا الحجلين) ..؟ وين (ملك الشعر) الدان .. الشاعر المرحوم علي عبيد محلتي .. صاحب القصيدة الشهيرة اللي قالها في أبين بعد أن جاها من الوهط .. وكان معاها (هتيل) فيها .. وخرج منها طفران نكدان ومنها: (أبين أبلت ناس من سابق وأبلتنا ×× أبين عملها فنى ×× كما دخلنا خرجنا) .. وللمحروم المحلتي قصة طويلة في أبين وقبلها في الوهط وحوطة لحج .. سبق وأن كتبت عنها في مجلة (الحكمة) في سنة (خمسة وسبعين ميلادية) وفي (صوت العمال) في نفس السنة أيضاً .. وين القاضي عمر حسن اسكندر وأبنه المحاسب والشاعر أحمد أسكندر..؟ آح .. يا أبين .. آح .. وين كنتي وكيف أصبحتي ..؟ كنتي (جناح عدن لخضر) من جهة الشرق .. أبين بلاد الثايرين والشهداء والمناضلين والقادة والزعماء الأقحاح .. سالمين .. علي ناصر محمد .. علي صالح عباد (مقبل) .. جاعم صالح .. محمد علي أحمد .. محمد صداعي علي .. علي سالم لعور .. أمجفة .. علي شيخ عمر .. سالم باجميل .. عيال أمزربة .. الجونة .. عيال القطي .. السفير ناصر صدح .. علي محمد حيدره .. عبدالباقي هزاع .. صديق أمجفة .. عيال جعسوس .. الداحمة .. أمطفي .. الداحي .. شيخ سميح .. القسي .. سالم الحاج .. سعيد عسيري .. ناصر الفضلي .. عيال غرامه .. سليمان ناصر محمد .. عبدالله العود .. محمد عبدالله البطاني .. مذلع .. سليمان ناصر مسعود .. عيال الكيله .. عبدالرحمن المعلم .. محمد سليمان ناصر .. بيت لخشع .. أبين بلاد الادباء والشعراء والفنانين والمطربين .. محمد محسن العطروش (فنان الثورة) .. صاحب أغنية: (تشتوا سلاطين لا .. تشتوا رجعية لا ..) ..؟ والشاعر نسير وعوض أحمد (أماه) وكور سعيد عوض .. ومسكين علي .. والمنولوجست عثمان عبدربه مريبش .. والشاعر التوي .. والشاعر صالح مهدي العولقي (أحور) .. وصالح لعمى .. وكم ياكم من أسامي..وكم بنذكر .. أبين (ساحة الشهداء) حقت زمان .. في عهد المحافظ محمد علي أحمد .. وين (أهل أمشعة) –قرية الشهداء - ؟ وينش ياعمة (خزانة) يا أم (ألشهيد سالمين).. يامن أنجبتي أشرف وأطهر وأنظف الرجال .. الي لا يتكرر مثلهم في هذا الزمان الوسخ..؟ آه يا ابين وين الاشياء الطبية والحسينة اللي كانت فيش..؟ والله يلعن اللي كان السبب في الحال الي تعيشه اليوم .. مؤامرة كبيرة حلتَ بأبين .. من داخلها .. وبيدات أهلها .. وبمسميات لم نعرفها من سابق .. فمن سنوات قليلة .. وأبين في تفجيرات .. وتذمير وقتل .. ونهب واستباحة .. ونزوح جماعي لأهلها نحو عدنولحج .. يا قهري عليش يا أبين .. لقد حان الوقت .. لعمل شي لأبين يستعيد عافيتها .. ووين أنته يا رئيس هادي من اللي يدور في محافظتك ..؟! ابين اليوم بحاجة الى تغيير من ساسها لا راسها .. ومن راسها لا رجولها ..!