مواضيع متعلقة 1. مريم memo مايو 26th, 2011 أنا 75 كيلو وفرحي بعد شهرين وضعيفه جدا قدام الأكل والحلويات خاصه وبمل من الرجيم مش عارفه اعمل ايه؟ أرجووووكم رد وبسرعة وشكرااا على مجهودكم الأكثر من رائع السلام عليكم ورحمة الله وبركاته. =========== رد بص وطل: أهلا بيكي صديقتنا العزيزة وشكرا ليكي على ذوقك ونتمنى إن المعلومات اللي بنقدمها تكون بتفيدك فعلا، وبالنسبه لسؤالك فالحل بسيط جدا وفي ايدك إنتي، وهو إنك تقنعي نفسك إن الريجيم ده مش معناه حرمان من الأكل أو تعذيب ليكي، لكنه تعديل في عاداتك الغذائية الغلط اللي كنتي بتعمليها واللي ممكن انها -لا قدر الله- تسبب لك مشاكل صحية بغض النظر عن الناحية الشكلية والجمالية، وبعد كده الموضوع هيبقى سهل أهم حاجة أنك يكون عندك الإرادة والعزيمة إنك تحققي اللي إنتي عايزاه، وبالنسبة للحلويات ابدئي قللي منها بالتدريج يعني ما تحرميش نفسك منها مرة واحدة، وكلي بكميات صغيرة منها، وحاولي إنك تستبدليها باكل الفاكهة، وإن شاء الله مع الريجيم وممارسة الرياضة زي المشي أو الجري أو أي رياضة تحبيها، هتقدري توصلي للوزن المثالي، وتكوني في فرحك زي القمر.. مع تمنياتنا ليكي بالتوفيق في حياتك اللي جايه. 2. السلام عليكم مايو 24th, 2011 أنا طولي 180 ووزني 95 الزيادة كلها في بطني وجنابي وافخادي وعندي ترهل في بطني ومش عارفة اعمل اية ياريت تساعديني. ============ رد بص وطل: الحل في خطوتين إنك تمشي على ريجيم صحي متوازن مع ممارسة التمارين الرياضية لأن مفيش ريجيم بيخسس منطقة معينة في الجسم، الريجيم بيخسس الجسم ككل، كمان الرياضة بتشد الجسم وبتعالج موضوع الترهلات ومع المواظبة عليها وعلى الريجيم هتحصلي على الجسم المثالي اللي بتحلمي به. 3. habiba مايو 24th, 2011 السلام عليكم أنا وزنى حاليا 85 وطولى 170 ونفسى اوصل لحتى 75 بس المشكلة انى جسمى مش بينزل لانى عملت ريجيم وكنت خسيت 20 ك ورجعت تخنت تانى ورجعت روحت جيم وخسيت 16 ك ووصلت ل85 مشكلتي إن كل حاجة عندي بتخس ما عدا الجناب وبطني وأنا فرحي كمان أسبوعين ونفسى اخس واخدت أعشاب كتير بس مفبش فايدة فياريت حد يقول لى اعمل ايه قبل الفرح وكمان انا ارادتى بتضعف لما مش بلاقى نتيجة واسفة على الاطالة. ============ رد بص وطل: الصديقة العزيزة.. إزاي بتقولي مش بتلاقي نتيجة وإنتي قدرتي تخسي 20 و16 كيلو، المشكلة بس هي إنك لما بتوصلي لمرحلة معينة بتتوقفي عن الريجيم وده اللي بيخلي جسك يرجع مرة تانية للوزن السابق، والحل إنك تتابعي دايما مع دكتور متخصص علشان يقدر يديكي النظام الغذائي المناسب مع كل مرحلة بتوصلي لها، وطبعا مع المواظبة على ممارسة التمارين الرياضية علشان تحافظي على جسمك من الترهل وتتخلصي من مشكلةالسمنة الموضعية. 4. دودو مايو 24th, 2011 يا جماعه انا وزنى 69 وحاولت اقلل أكلي لكن مفيش فايدة مش راضي يخس أكتر شىء مضايقني البطن اخسسها إزاي. ============ رد بص وطل: صديقتنا العزيزة يا ريت تبعتي لنا طولك علشان نقدر نعرف إنتي محتاجة تخسي أد ايه بالظبط، وعامة الموضوع مش محتاج منك إلا أنك تمشي على ريجيم صحي متوازن مع ممارسة التمارين الرياضية حتى ولو كانت تمارين بسيطة زي المشي والجري وطلوع السلم. 5. فوفا مايو 23rd, 2011 هاي يا قمري أنا طولى 156 ووزني 68 وعندي أكتر حاجة مخلياني تخينة هى البطن والجناب وممكن اقعد طول النهار مش اكل حاجه بس بحب قوى السكريات وبروح النادى العب فى الجيم باستمرار وابتديت اقلل فى السكريات بس حاسه مفيش نتيجة بليز قولي لي اعمل ايه وثانك يو الك. ========= رد بص وطل: الرياضة هي أحسن حل للسمنة الموضعية لكن الموضوع بيحتاج لوقت ومواظبة على التمارين الرياضية وإنك ماتزهقيش وتفقدي الأمل بسرعة وطبعا إلى جانب اتباع ريجيم صحي متوازن. 6. زائر مايو 21st, 2011 ازيك يا رانا انا كنت عايزة اعرف أنا وزني 65 وطولي 161 وأنا عايزة انزل من وزنى شوية ومشكلتى فى الجزء اللى فوق من الجسم الاكتاف والبطن والصدر وعملت رجيم ونزلت بس برجع تانى ولما بنزل من وزنى بنزل من تحت مش من فوق كنت عايزة اعرف اعمل ايه. =========== رد بص وطل: أهلا بيكي يا مي، وزي ما بنقول دايما علاج السمنة الموضعية هي ممارسة التمارين الرياضية الخاصة بشد عضلات المنطقة اللي فيها السمنة علشان تحرق الدهون اللي فيها، وعموما إنتي مش محتاجة تنزلي كيلوات كتيرة، يعني كل اللي عليكي إنك تظبطي أكلك وتروحي الجيم وتواظبي على التمارين الرياضية. 7. بسنت مايو 21st, 2011 ازيكم يا جماعه انا كنت عاوزة استفسر عن حاجة أنا وزني 73 وطولى 162 وعاوزة اخس ضرورى لان فرحى قرب وخصوصا منطقه البطن مع العلم ان الحركه مش كتيره ممكن اعرف حل سريع ويجيب نتيجه بسرعه مع العلم ان نزولى بيبقي ببطئ شكرا وسورى ع الاطاله اتمنى الاقي رد بسرعه. =========== رد بص وطل: صديقتنا العزيزة.. مش لازم نزول الوزن يكون سريع لأن كل جسم وله طبيعته، ومعدل الرحق بيختلف من شخص لآخر، كل اللي عليكي إنك تمشي على ريجيم صحي متوازن وتتأكدي إنك بتنفذي كل التعليمات بدقة، مع ممارسة التمارين الرياضية، وأهم حاجة إنك ما تفقديش الأمل بسرعة، لأن طبيعي جدا إن جسمك بالفطرة هيقاوم الريجيم، لكن مع الوقت والصبر والمواظبة هتحققي النتيجة اللي إنتي عايزاها. 8. fathy_200022 مايو 19th, 2011 السلام عليكم.. أنا عايز انزل جامد في شهر بالكتير وأنا وزني تقريبا 98 وطولى 185 ونفسي اظبط جسمي يا ريت تقولوا لي الأكلات والمواعيد واعمل ايه وشكرا. ========== رد بص وطل: الصديق العزيز.. لازم تمش يعلى نظام غذائي تحت إشراف دكتور متخصص علشان يديك النظام الغذائي المناسب لطبيعة جسمك، وأهم حاجة ممارسة التمارين الرياضية حتى ولو كانت تمارين بسيطة زي المشي أو الجري. 9. ايمى مايو 17th, 2011 انا وزنى 61 وطولى 160 انا عارفه ان وزنى ماشى مع طولى بس مشكلتى ان فيا جناب وبطن ومش عايزه اخس غير ف دول بس قولي لى اعمل ايه شكرا. ========== رد بص وطل: حل المشكلة دي هو ممارسة التمارين الرياضية بانتظام حتى ولو كانت رياضة المشي وطلوع السلم لان التمارين دي بتحرق الالدهون في منطقة البطن والارداف ولكن مع الانتظام والمواظبة، وممكن كمان تشتركي في نادي رياضي (جيم) علشان تعملي التمرينات تحت إشراف مدرب متخصص وأهم حاجة إنك تحافظي على اكلك وتاخدي بالك إنك ماتاكليش بالليل وإنك تتعشي حاجة خفيفة لأن الأكل الدسم بالليل بيعمل بطن. 10. shmr.shmr مايو 16th, 2011 انا قرات حاجات مفيده جدا بس انا عندى سؤال انا وزنى 78 ك وطولي 160 والزيادة عندي في البطن والأرداف ممكن تقول لي على نظام اتبعه في انقاص الوزن من غير دكتور. ============ رد بص وطل: بالنسبة للسمنة الموضعية فدي حلها إنك تمشي على ريجيم مع ممارسة بعض التمارين الرياضية علشان تشد العضلات وتحرق الدهون في مناطق جسمك اللي الدهون متركزة فيها، وده لينك لريجيم ممكن تمشي عليه لكن الأفضل إنك تروحي لدكتور علشان يديكي نظام غذائي مناسب لطبيعة جسمك ولحالتك النفسية، وده لينك الريجيم http://www.boswtol.com/health-and-beauty/diet/11/february/27/27982 11. ام ملك مايو 16th, 2011 انا كان وزنى قبل الحمل 58 كيلو ووصلت أثناء الحمل ل 80 كيلو وبعد الولادة القيصري وصلت 68.5 كيلو بس مش عارفة اخس عن كده والسمنة متركزة عندى فى منطقة الوسط والفخذين اعمل ايه خصوصا انى مش عندى وقت العب رياضة ولا ينفع امشى على ريجيم بس عاوزاكم تقولوا لى ابعد عن ايه في الاكل. ========== رد بص وطل: الصديقة العزيزة مفيش مشكلة في إنك تمشي على ريجيم في فترة الرضاعة، بس الريجيم لازم يكون متوازن يعني تنزلي بالكثير 4 كيلو فى الشهر، مع إضافة بعض الزيوت، ولبن خالى الدسم، وورقيات، وفاكهة، وسوائل كثير، وده لينك لريجيم مناسب لفترة الرضاعة، وممكن تعملي بعض التمارين الرياضية الخفيفة زي المشي وممكن تعتبري الأعمال المنزلية وطلوع السلم من التمارين الرياضية. 12. memo212 مايو 14th, 2011 السلام عليكم.انا وزنى زاد جدا بعد الولاده التانيه ويمكن كمان عشان المرتين الولاده كانت قيصرى وتقريبا وزنى وصل ل94 وانا اصلا وزنى 72 وطولى 167 بقالى فتره بشرب شاى اخضر ليبتون ووزنى وصل بعد شهرين 89 عايزه اعرف الشاى الاخضر فعلا ليه تاثير على الرجيم وبيضر فالرضاعه ولا لاء؟ ================= رد بص وطل: الشاي الأخضر يدخل تحت مسمى المواد التي لها تأثير محدود أو غير مؤثر في الريجيم، لكنه غير مضر وله فوائد تانية لا يمكن تجاهلها زي احتوائه على مواد مضادة للأكسدة ومهم لزيادة المناعة، لكن تأثيره في موضوع الريجيم لا يستحق أن أعتبره من أدوية الريجيم سواء أقراص أو شاي 13. زائر مايو 14th, 2011 انا عندي 13 سنة طولي 154 وزني من 60 الي 85 كجم حاولت اعمل ريجيم اكتر من مره ونجحت في مره وخسيت بس انا بحب الحلويات اوي كان عندنا فرحين في يومين متتالين فكلت فتخنت تاني وحاولت تاني السنة دي ونجحت وخسيت بس تخنت تاني شوية وبعد كده حفظت علي وزني بس نفسي اخس باي شكل من غير دكتور ================= رد بص وطل: صديقتنا العزيزة.. كل اللي انتي محتاجه له شوية ارادة وعزيمة وانك تاخدي موقف مع نفسك وتقرري انك توصلي للوزن الصحي علشان تحافظي على صحتك وشكلك، وده مش هيحصل الاباتباع ريجيم صحي موازن مع ممارسة بعض التمارين الرياضية وممكن تبدئي في اجازة الصيف وده لينك لريجيم ممكن تمشي عليه http://www.boswtol.com/health-and-beauty/diet/10/june/6/14848 14. زائر مايو 14th, 2011 ازاي ازيد خمسه كيلو انا رفيعه أوي ساعدوني بليز احتاج 5 كيلو واكون وصلت الوزن المثالي. =========== رد بص وطل: حاولي تكثري من الاكلات اللي فيها سعرات حرارية عالية زي العسل والحلاوة، وتابعي دايما وزنك على الميزان ومع ممارسة التمارين الرياضية وزنك هيزيد بس لازم تتاكدي مفيش عندك مشاكل عضوية هي السبب في نقص وزنك زي الانيميا او مشاكل في الغذاة الدرقية او اي سبب عضوي تاني -لا قدر الله- وكمان لازم تعرفي ان علاج النحافه بيحتاج لوقت اكبر من علاج السمنة لانك بتبني جسمك. 15. نورا مايو 13th, 2011 اولا احب اشكركم جدا وانا متاكدة ان الشكر ده لا يوفى حقكم وربنا يجزيكم خير ويجعله فى ميزان حسناتكم ثانيا انا كنت 86 والحمد لله خسيت 10 كيلو وبقيت 76ومبنزلش عن كده وانا طولى 1.74 المهم دلوقتى انى نفسى اوصل للوزن المثالى يعنى على الاقل ابقى 70 بس المشكلة انى بعد ما خسيت بقيت السمنة عندى موضعية فى الارداف مش عارفة اعمل ايه ؟ بحاول العب رياضة على قدر المتاح يعنى بعمل تمرين شد عضلات للرجل وتمرين شد عضلات البطن وبنزل واطلع السلم كتير جدا يعنى ممكن 50 مرة او اكتر فى اليوم ومع ذلك انا ثابته مع العلم انى مش باكل كتير ولو اكلت باكل اكل الريجيم ولما بزهئ بفتح فى الاكل من الياس ============== رد بص وطل: أولا احب اشكرك صديقتنا العزيزة على كلامك الجميل، لأن كلامكم ده هو اللي بيشجعنا دايما، وكمان عايزة احييكي على نجاحك في الريجيم وانك قدرتي تنزلي 10 كيلو من وزنك بالاراده والعزيمه، بس كل اللي بطلبه منك انك تكملي المشوار اللي بدأتيه واللي خلاص قربتي تنجزيه وتحققي اللي انتي عايزاه، كل اللي عليكي انك تغيري النظام الغذائي اللي انتي ماشيه عليه لان ساعات الجسم بيتعود على نظام معين وبيبدا يقاومه علشان كده لازم تستشيري الدكتور المتابع لحالتك علشان يديكي نظام غذائي جديد وفقا لاحتياجات جسمك، بس اهم حاجه انك تفضلي مواظبة على التمارين الرياضية، وبلاش تزهقي وتفقدي الأمل علشان ما تخسريش كل اللي حققتيه. 16. maeada مايو 13th, 2011 اسم دكتور كويس للتغذيه فى اسكندريه 17. maha ahmed مايو 12th, 2011 هى الرياضه فعلا ممكن تخلى الخطوط البضاء اللى فى الارداف والصدر تروح ولا لا =========== رد بص وطل: طبعا التمرينات الرياضية بتساعد جدا على شد الجلد وبيخلي البشرة رايقة وشكلها فيه صحة وحيوية، ومع المواظبة على التمرينات والحفاظ على وزن الجسم الخطوط دي هتختفي مع الوقت ان شاء الله وممكن تستشيري دكتور جلدية متخصص علشان يوصف لك بعض الكريمات الطبية اللي تساعد على سرعة اختفائها. 18. ام اسر مايو 12th, 2011 السلام عليكم انا بشكركم على الموضوع الرائع ده بس انا والده من 7 اشهر وعايزة اعمل ريجيم وخايفه ع الجرح ابدا الريجيم ولا استنى قد ايه انا والده قيصرى. =========== رد بص وطل: مفيش مشكلة انك تبدئي الريجيم مع الرضاعة بس لازم يكون تحت اشراف دكتور متخصص علشان يديكي نظام غذائي صحي ومتوازن يوفر لجسمك كل اللي بيحتاج له في الفترة دي، ولازم الريجيم يكون فيه خضراوات ورقية ومنتجات ألبان. 19. hind مايو 12th, 2011 بجد معلومات رائعةلريجيم بس بجد لو حد عاوز يخس انا ممكن اساعدة بطريقة صحية جدا 20. ho_ssam7 مايو 12th, 2011 ريجيم ايه ده انا لو عملت ريجيم هختفي من الحياه ههههههههههههههههههههههههههههههههههههههههههه 21. زائر مايو 12th, 2011 انا عايزه اسم برشام كويس للريجيم. ============ رد بص وطل: الأفضل للتخسيس إنك تمشي على نظام غذائي صحي وتغيّري عاداتك الغذائية الخاطئة وتتعودي على العادات الصحية، ولو فعلا جسمك محتاج لمساعدة بالادوية لازم الدكتور المتابع لحالتك هو اللي يقول لك على الدواء المناسب، وماتنسيش اهمية ممارسة التمارين الرياضية. 22. يارا مايو 11th, 2011 كلامك جميل جدا ولكن لي سؤال هل صحيح بذور الرجلة مفيدة لانقاص الوزن؟ شكرا ليكم علي المجهود الرائع. ============ رد بص وطل: شكرا ليكي صديقتي العزيزة على ذوقك واتمنى أكون قدرت افيدك فعلا، وبالنسبة لبذور الرجلة او ألأعشاب عموما فهي ممكن يكون لها فوائد كتيرة لكن بالنسبة لموضوع التخسيس فهي بتمنع امتصاص الكثير من المواد الغذائية وبالتالى قد تساعد على فقدان الوزن ولكنها قد تضر الجسم. 23. شوشو مايو 11th, 2011 انا عايزه نظام ريجيم ااقدر امشى عليه أنا وزنى من 80 إلى 85 كيلو بليز محتاجة رد ويا ترى امشى مع دكتور ولا في الجيم عادي على نظام الكابتن تديهولي وشكرا. ========== رد بص وطل: الأفضل إنك تستشيري دكتور متخصص علشان يقول لك على نظام غذائي مناسب ليكي ولطبيعة جسمك ولحالتك النفسية وتقدري تواظبي عليه وطبعا مع ممارسة التمارين الرياضية زي المشي أو الجري أو السباحة أو اي تمارين حتى ولو كانت بسيطة. 24. هبه مايو 11th, 2011 السلام عليكم.. أنا كنت 85 ك ومشيت على ريجيم د.محمد أبو الغيط والحمد لله خسيت 5 ك فى اسبوعين بس المشكله ان وزنى ثبت ووقف عند 80 ومش عاوز يتحرك ومش عارفه اعمل ايه ممكن تفيدونى أرجوووووكم. =========== رد بص وطل: صديقتنا العزيزة، لازم تتأكدي إنك متابعة على الريجيم بانتظام وإن مفيش أي لخبطة فيه، وممكن تسجلي كل حاجه بتاكليها –حتى الشاى والقهوة أي حاجه بتدخل المعده- في جدول لمده اسبوع وعرضها على متخصص عشان يقدر يحدد فين اللخبطه بالتحديد، لو استمر الوزن ثابت نلجأ إلى مساعدة الجسم بالدواء ولكن تحت إشراف دكتو متخصص، ولو بعد الالتزام والدواء المشكله مستمرة ممكن نجرى تحليل هرمونات لان قد يكون هناك لخبطه فى الهرمونات او فيه مشكلة ما تسبب زيادة الوزن او تمنع انقاص الوزن. بص وطل
